अशोक शिवाकोटी
काठमाडौं/ आफ्ना वृद्ध आमाबुबाको सेवा गर्नु हरेक नागरिकको कर्तव्य भए पनि त्यो कर्तव्यबाट आजभोलिका मानिसहरु विमुख बन्दै गएको कुरालाई बालबालिकाहरुले नाटकमार्फत् खबरदारी गरिरहेका छन् ।
शैली थियटर, रुसी सदन, संस्थागत विद्यालय संघ नेपाल (इसान) र ओजस थियटरले संयुक्त रुपमा आयोजना गरेको १५औं राष्ट्रिय बालनाटक महोत्सवमा रंग निर्देशक टंक चौलागाईको लेखन, मञ्जु गिरीको निर्देशन र श्रीयन्त्र फाउण्डेशन मूलपानी प्रस्तोता रहेको नाटक साथमा बाल कलाकारहरुले यस्तो खबरदारी गरेका हुन् ।
नाटकमा कलाकारहरु अदम कार्की, सदीक्षा पौडेल, आशिष सुवेदी, आकृति भण्डारी, रुक्मिनी फुयाँल, कुशल श्रेष्ठ, निशा ढकाल, उज्वल कार्की, जेनिशा राउत, शंकर शाह, प्रशान्त भुजेल, सुश्रित खतिवडा, रोशन कार्की, त्रिशा थापा, अभिषेक घिमिरे, ललिता अधिकारी, दिया तामाङ आदि कलाकारहरुले आफ्नो अभिनय प्रस्तुत गरेका थिए । त्यस्तै हरिस थापा, विनिता पण्डित थापा, रिता आचार्य, सोफिया, बज्राचार्यले नाटक मञ्चनका लागि पाश्र्व मञ्चमा सहयोग गरेका छन् ।
नाटकले आफ्ना घरमा रहेका हरेक सदस्यहरु त्यसमा पनि ज्येष्ठ नागरिकहरुसँग बालबालिकाको निकट सम्बन्ध रहेको हुन्छ । परिवारले उनीहरुलाई अपमान र तिरस्कार गर्नाले उनीहरुको मनमा ठेस पुग्ने र आफ्नो परिवारप्रति नै वितृष्ण पैदा हुने र त्यही सिको बालबालिकाले समेत सिक्ने हुनाले हरेक परिवारमा आफ्ना अग्रजहरुको सम्मान सदैव गर्नुपर्ने मूल सन्देश नाटकले बोकेको छ ।
निर्देशक गिरी सन् २०१० देखि निरन्तर रुपमा नाटय गतिविधिमा लागिरहेकी सृजनशील युवा रंगकर्मी हुन् । मञ्जुश्री गुरुकुलम् नामक संस्थाकी अध्यक्षसमेत रहेकी गिरी थियटर मल, राराहिल, कीर्तिपुर रंगमञ्चसँग पनि आवद्ध छिन् । यसैगरी गिरी नाट्यकर्मी महासंघ, नेपालकी कोषाध्यक्ष पनि हुन् ।
सोही महोत्सवमा इच्छा सिंको लेखन तथा निर्देशन रहेको एलिट ग्राण्ड स्कुल चुच्चेपाटीको प्रस्तुती र नोना ज्ञवाली, आर्याश्री चौलागाँई, एलेक्स गिरी, आराध्या कार्की, एरिना सोनार, ल्हामु शेर्पा, आदिभका आदिको बेजोड अभिनय रहेको नाटक अनिच्छित सोच २११२ पनि मञ्चन भएको थियो । नाटकले घर परिवारमा बालमैत्री वातावरण नहुँदा परिवारका सदस्यहरुले बालबालिकाको इच्छा र भावनाको कदर नगरिदिँदा बालबालिकाको मनोविज्ञानमा पर्नसक्ने असरको बारेका अभिभावकवर्गलाई सचेत गराएको बताइएको छ ।
हरेक अभिभावकले आफ्ना छोराछोरीको सपनालाई बेवास्ता गर्दै आफ्नै सपनामात्र उनीहरुमाथि लाद्ने हो भने हरेक बालबालिकालाई मनोसामाजिक रोगले गम्भीर रुपमा च्याप्ने र यो भाइरसकै रुपमा फैलन पनि सक्ने कुरालाई लिएर नाटकले बालबालिकाको सुन्दर भविष्यप्रति चिन्ता व्यक्त गरेको छ ।
निर्देशक सिं पनि बाल कलाकारदेखि नै नाट्य क्षेत्रमा सक्रिय रहँदै आएकी प्रतिभाशाली रंगकर्मी हुन् । उनले यसै विधासँग सम्बन्धित थुप्रै पुरस्कार पनि पाइसकेकी छिन् ।
