इसेवा र आइएमएसको सहकार्य

काठमाडौँ/ डिजिटल भुक्तानी सेवाप्रदायक इसेवा र व्यावसायिक समाधान प्रदायक आइएमएसले संयुक्त रूपमा …इन्टरप्राइज पेमेन्ट सोलुसन्स (Enterprise Payment Solutions) सार्वजनिक गरेका छन् । नयाँ प्रणालीमार्फत व्यवसायीहरूले अब आफ्ना विक्रेता, साझेदार तथा अन्य हितग्राहीलाई प्रत्यक्ष रूपमा डिजिटल माध्यमबाट भुक्तानी गर्न सक्ने सुविधा पाउने भएका छन् ।
दुई संस्थाबीचको सहकार्यले आइएमएसको इन्टरप्राइज व्यवस्थापन क्षमता र इसेवाको डिजिटल भुक्तानी पूर्वाधारलाई एकीकृत गर्दै भुक्तानी प्रक्रियालाई अझ छिटो, सरल र सुरक्षित बनाउने लक्ष्य राखेको छ । यस प्रणालीले चेकमा आधारित परम्परागत कारोबारमा निर्भरता घटाउँदै म्यानुअल भुक्तानी प्रक्रियामा लाग्ने समय र झन्झट उल्लेखनीय रूपमा कम गर्ने अपेक्षा गरिएको छ ।
नयाँ समाधानमार्फत व्यवसायीहरूले आफ्नो वित्तीय कार्यप्रवाहमा थप पारदर्शिता र नियन्त्रण कायम राख्दै भुक्तानी व्यवस्थापनलाई प्रभावकारी बनाउन सक्नेछन् । हाल प्रयोगमा रहेका प्रणालीहरूसँगै सिधै डिजिटल भुक्तानी गर्न सकिने भएकाले उद्यमी तथा संस्थाहरूले समय बचत गर्दै आफ्नो मुख्य व्यावसायिक गतिविधिमा ध्यान केन्द्रित गर्न सक्ने बताइएको छ ।
इसेवा र आइएमएसका अनुसार यो सहकार्यले व्यावसायिक भुक्तानी प्रणालीलाई आधुनिक बनाउने र संस्थाहरूलाई डिजिटल रूपान्तरणतर्फ अघि बढ्न सहयोग गर्ने साझा उद्देश्यलाई प्रतिबिम्बित गर्दछ । विभिन्न भुक्तानी क्षमतालाई एउटै कार्यप्रवाहमा समेट्दै व्यवसायीहरूलाई अझ सहज र विश्वसनीय अनुभव प्रदान गर्ने लक्ष्यसहित दुवै संस्था अघि बढिरहेका छन् ।
दुवै संस्थाले उद्यमी तथा व्यवसायीका लागि सरल, भरपर्दो र इनोभेटिभ भुक्तानी समाधान उपलब्ध गराउँदै व्यावसायिक प्रक्रियालाई सहज बनाउने प्रतिबद्धता व्यक्त गरेका छन् ।