लक्ष्मी सन्राइज वार्षिक साधारणसभा

काठमाडौं/ लक्ष्मी सन्राइज बैंकको पूर्ण स्वामित्वमा बैंकको सहायक कम्पनीका रुपमा संचालित लक्ष्मी सन्राइज क्यापिटल लिमिटेडले आफ्नो १४औं वार्षिक साधारणसभा गरेको छ । गत आइतबार लक्ष्मी कम्प्लेक्स हात्तीसार काठमाडौंमा साधारणसभा भएको हो ।
आ.व. २०८०÷०८१ मा लक्ष्मी क्यापिटल मार्केट र सन्राइज क्यापिटल एक आपसमा गाभिई २०८० पौष २३ गतेबाट संयुक्त कारोबारको थालनी गरिएको थियो । दुई कम्पनीको मर्जर पश्चात कम्पनीको चुक्ता पुँजी रु.४८,८९,००,००० कायम भएको छ । वार्षिक साधारणसभामा प्रस्तुत भएका सामान्य प्रस्तावहरुमा आ.व. २०८०÷०८१ को वार्षिक प्रतिवेदन, सोही अवधिको आषाढ मसान्तको वासलात, नाफा–नोक्सान हिसाब, नगद प्रवाह विवरण सम्बन्धी प्रस्ताव पारित गरिएको थियो ।
मर्जरपश्चात आ.व.२०८०÷०८१ को एकीकृत वासलात बमोजिम प्रतिशेयर आम्दानी १९.६० प्रतिशत रहेकोमा वितरण योग्य आम्दानी १७.८९ प्रतिशतमध्येबाट आफ्ना शेयरधनीहरुलाई १५.७९ प्रतिशत अर्थात् रु.७,७१,९४,७३६.८० (१५ % कर बाहेक) नगद लाभांश वितरण गर्ने प्रस्ताव समेत पारित गरियो । तीन दशकभन्दा अधिक समयदेखि मर्चेण्ट बैंकिङ्ग सेवामा सकृयताका साथ संलग्न रहेको यस कम्पनीले हालसम्म सबैभन्दा बढी संस्थाहरुको शेयर निष्काशन तथा बिक्री प्रबन्धकको कार्य सम्पन्न गरेको छ ।
हाल २० वटा कम्पनीहरुको शेयर निष्काशनको क्रममा रहेको छ । कम्पनीले करिब २५० जना ग्राहकहरुको ७० करोड रुपियाँभन्दा बढी रकमको पोर्टफोलियो व्यवस्थापन गर्दै आइरहेकोे छ र कम्पनीले करिब ३.५० लाख निक्षेप सदस्यहरुको डिम्याट खाता खोल्न सफल भएको छ ।
कम्पनीले करिब ७ अर्ब बराबरको ६ वटा बन्दमुखी म्युचुअल फण्ड र १ वटा खुल्लामुखी म्युचुअल फण्ड संचालन गर्दै आइरहेकोमा २०८१ जेठ २८ मा १ अर्ब २५ करोड रकम बराबरको सात वर्ष अवधिको लक्ष्मी इक्विटी फण्ड परिपक्व भई सात वर्षको अवधिमा ईकाईधनीहरुलाई जम्मा ६३.६५ प्रतिशत प्रतिफल प्रदान गर्न सफल भएको छ । यो परिपक्व भएपश्चात सोका ईकाइधनीहरुलाई रु ११.१४ प्रति ईकाइका दरले रकम फिर्ता भुक्तानी गरिएको र बाँकी ५ वटा योजनाले आ.व. २०८०÷०८१ को मुनाफाबाट ४.५० देखि १२.५० प्रतिशत प्रतिफल वितरण गरेको छ ।
विशिष्टीकृत लगानी कोष सेवा अन्तर्गत एक अर्ब रुपियाँ बराबरको लक्ष्मी सस्टनेवल ईनर्जी फण्ड स्वीकृती प्राप्त गरी उक्त फण्डले लगानीकर्ताहरुबाट करिब रु.४० करोड संकलन गरिसकेको, बाँकी रकम चालु आ.व. मा संकलन गर्ने लक्ष्यरहेको कम्पनीले जानकारी दिएको छ ।