‘मौन’ को फस्टलुक पोस्टर सार्वजनिक

काठमाडौं/ रिसर्चमा आधारित डकुड्रामा ‘मौन’ को फस्टलुक पोस्टर सार्वजनिक गरिएको छ । यो फिल्म सेलिब्रेटी टाइम्सको ब्यानरमा निर्माण गरिएको हो । यसलाई विभिन्न फेस्टिबल, च्यारिटी शो तथा विशेष प्रदर्शनीमार्फत दर्शकमाझ पु¥याउने तयारी गरिएको निर्माताले जनाएका छन् ।
गत शनिबार सार्वजनिक पोस्टरमा फिल्मकी मुख्य पात्र प्रार्थना पाठकलाई फिचर्ड गरिएको छ । चर्चित कलाकारहरू सरोज खनाल र हिउँवाला गौतम लगायतलाई भने यो पोष्टरमा लुकाइएको छ । पोस्टरसँगै फिल्मका मुख्य सदस्यहरू पनि सार्वजनिक गरिएका छन् ।
फिल्मका निर्देशक तथा निर्माता रामजी ज्ञवालीले आफ्नो अफिसियल फेसबुक पेजमा ‘मौन’ कुनै व्यावसायिक प्रोजेक्ट मात्र नभएको जनाएका छन् । उनले हलमा दर्शक तान्न अनावश्यक भ्रम छर्ने कुनै योजना नबनाइएको पनि जनाएका छन् । ‘यो एउटा वास्तविक जीवनसँग जोडिएको कथा हो, जसले समाजलाई सचेत बनाउन महत्वपूर्ण भूमिका खेल्नेछ ।’ भन्ने कुरा उनले पेजमा लेखेका छन् ।
फिल्मको कथा चर्चित निर्देशक रामशरण पाठकले लेखेका हुन् । सिनेमाटोग्राफी शंकल्प भुजेल, सहायक निर्देशन वसन्त अधिकारी तथा पोस्टर फोटोसुट कुवेर डंगोलको रहेको छ । पोस्टर टौवा स्टुडियोमा निर्माण भएको जनाइएको छ ।
वरिष्ठ कलाकार सरोज खनाल, हिउँवाला गौतम, नव कलाकारहरु प्रार्थना पाठक, ओजस्वी विक्रम विस्ट, दिवस नाथ लगायतका कलाकारहरु रहेको जनाइएको छ । फिल्मका सहायक निर्माता हरि क्षेत्री भूपेन्द्र हुन् ।