त्रिदेशीय महिला क्रिकेट हुने

काठमाडौं/ नेपालको आयोजनामा आगामी जनवरी ३० अर्थात आगामी माघ १७ गतेदेखि त्रिदेशीय महिला टी २० आई श्रृंखला हुने भएको छ । माघ २५ गतेसम्म चल्ने उक्त श्रृंखलामा नेपाल, नेदरल्याण्ड्स र थाइल्याण्ड सम्मिलित महिला टोलीको सहभागिता रहने आयोजकले जनाएको छ ।
नेपाली महिला टोलीको नेदरल्याण्ड्ससँग पहिलो अनुभव हुने नेपाल क्रिकेट संघ क्यानले जनाएको छ । जनवरी ३० देखि फेब्रुअरी ७ सम्म कीर्तिपुरस्थित त्रिवि क्रिकेट मैदानमा हुने श्रृंखलामा सबै टोलीले एक अर्कासँग ३–३ खेल खेल्ने कार्यक्रम रहेको क्यानले जनाएको छ ।
पहिलो खेल नेपाल र नेदरल्याण्ड्सको बीच हुनेछ । त्यसैगरी नेपालले थाइल्याण्डसँग ३१ जनवरीमा खेल्ने छ । फेब्रुअरी १ मा नेदरल्याण्ड्स र थाइल्याण्डका बीच खेल हुने छ । त्यसपछि ७ फेब्रुअरीसम्म लगातार सोही क्रमका खेलहरू हुने जनाइएको छ ।
यो श्रृंखलाले महिला क्रिकेट खेलाडीहरूलाई थप प्रेरणा तथा उत्साह थप्ने विश्वास लिइएको छ । यसैबीच नेपालको महिला यू–१९ टोली ऐतिहासिक विश्वकपमा सहभागी हुन शनिबार नै मलेसिया प्रस्थान गरिसकेको छ ।